A Xunta de Galicia destinou nos últimos dous anos 625.934 euros en axudas a proxectos de carácter medioambiental liderados polas confrarías coruñesas das rías de Arousa e Muros e Noia. Deste orzamento, un total de 321.871 euros foron investidos en 2016 e 313.063 neste ano 2017. Nestas rías, as confrarías que participan neste programa foron as de Muros, Cabo de Cruz (Boiro), Noia, O Pindo (Carnota), A Pobra do Caramiñal, Porto do Son, Rianxo, Ribeira e Carreira e Aguiño (Ribeira).

Trátase dunha orde bianual, que está dotada en total con máis de 3,1 millóns de euros a repartir entre 26 confrarías da provincia da Coruña. Conta co financiamento do Fondo Europeo Marítimo e de Pesca (FEMP) e está destinada a proxectos que contribúen á protección e recuperación da biodiversidade mariña a través dunha mellor xestión e conservación dos recursos e dos ecosistemas, así como ao fomento da sensibilización ambiental. Os proxectos realízanse a través de asistencias técnicas, que son as que financia esta orde.

O delegado territorial da Xunta na Coruña, Ovidio Rodeiro, explicou que as achegas buscan que a Consellería do Mar e as confrarías leven a cabo un seguimento conxunto das actuacións e tomen as medidas oportunas para o seu correcto desenvolvemento. “Deste xeito, a Xunta traballa conxuntamente co sector na defensa do medio mariño con medidas de xestión e de apoio aos profesionais que permitan acadar a máxima rendibilidade sen poñer en perigo a conservación do recurso e do seu medio”, apuntou.